Awe ta Djaluna 28 di Juli 2014

Notisia360

Editorial – Balor di Bida

08:40

  14 January 2014
Editorial – Balor di Bida

WILLEMSTAD - A para bira kustumber riba nos pais ku hopi hende no ta respetá bida di otro mas. Atrakonan arma, ku violensia i hasta morto komo konsekuensia, a para bira òrdu di dia. Aksidentenan di tráfiko ku konsekuensia fatal tambe ta na òrdu di dia. Djarason dia 8 di Yanüari 2014 atrobe nos por a mira un ehèmpel klásiko di esaki. Un Haitiano, sin reibeweis i sin seguro di outo, ta disidí di kore pasa rei di outo pa despues dal frontal kontra un famia Hulandes ku tabata bini di direkshon kontrali. Konsekuensia di e aksidente horibel aki ta 2 morto i un herido. Un tata ku un mama ta bai laga un yu di 6 aña huérfano. Simplemente no ta respetá reglanan di tráfiko mas. Esaki ta duna motibu pakiko nos ta bisa ku mester introdusí sierto leinan nobo. No por ta asina ku nos ta keda chambuká den leinan bieu for di tempu di kouchi baulo. E tempunan ei ainda nos hendenan tabata demostrá rèspèt pa nos leinan. Awendia esei tambe a pasa pa antaño. Den nos konsepto e Haitiano sinbèrgwensa aki mester bai sera pa por lo ménos 10 aña. E aksidente aki a sosodé bisto i klaramente pa su falta di respetá nos leinan di tráfiko. Kemen e la okashoná un aksidente di tráfiko ku morto komo konsekuensia. Pa esaki e lo mester paga karu. Dia aden, dia afó nos ta testigu di e tipo di antisosialnan aki ku ta kere ku kaya ta di nan so. Ántayera mes tambe un individuo a disidí di pasa bòshi outo pareu riba Santa Rosaweg. Su kareda a bin kaba ku un aksidente frontal komo konsekuensia. Den e kaso aki no tabatin morto komo konsekuensia pero meskos e lo por tabata e kaso si. E antisosial aki despues di su akto a para heringá tambe. Inkreibel. E mener aki mester pèrdè su reibeweis pa por lo ménos 2 aña. Ta e tipo di leinan aki nos dirigentenan polítiko mester kuminsá introdusí si nos ke frena e ola di mortonan ku ta kai den nos komunidat pa motibu di tráfiko insigur i/òf kriminalidat. Sinseramente nos ta spera ku lo hasi oido na nos sklamashon pa introdusí leinan severo pa frena e falta di rèspèt pa nos leinan aki. Nos lo sigui vigilá e tipo di kosnan aki ku wowo di falki.

Tag's
Kompartí

Notisia Similar