Today is Friday 25 April 2014

Notisia360

Wega di number na Boneiru mas atraktivo ku introdukshon di ‘Match’

06:19

  19 April 2013
Wega di number na Boneiru mas atraktivo ku introdukshon di ‘Match’

Fundashon Wega di Number BonaireKralendijk – Fundashon Wega di Number Bonaire ta bai hasi wega di number mas atraktivo. Entrante djaluna, 22 di aprel 2013, lo introdusí ‘Match’. Esaki ta un variashon riba e konosido wega di number. Ku e inovashon aki, e kumpradó di un dòler na kuater sifra, tin chèns pa kai den premio tòg, si su kuater sifra sali di ‘match’ den kabes.

Fundashon Wega di Number tin 20 aña largu ta organisando wega di number na Boneiru. Durante di e temporada ku a transkurí no a hasi ningun kambio ni inovashon den e wega aki.

Kambionan ta nesesario komo ku mundialmente wega di suerte a desaroyá. Di otro banda na Boneiru tambe ya pa algun tempu kaba e kumpradónan ta pidi pa introdusí otro tipo di wega mas atraktivo. Asina FWNB por sigui kumpli ku su metanan.

No opstante diferente intento pa introdusí weganan nobo, esaki a resultá difísil, komo ku lei no ta pèrmití esaki sin mas. Awor ku Boneiru ta den un struktura estatal nobo, kambio di lei no ta tuma lugá den Konseho Insular di e isla mas, sino den Tweede Kamer na Hulanda.

Kambio di lei pa hasi introdukshon di weganan nobo riba nos isla posibel ta tuma su tempu. E sistema mas fásil i faktibel pa bin ku inovashon i ku no ta rekerí kambio di lei, ta pa medio di ampliashon i variashon di e wega di number, manera ku nos konosé na e momentunan aki.

‘Match’ no ta un wega nobo, sino simplemente un variashon i ampliashon di e aktual wega di number. ‘Match’ ta duna e kliente kumpradó un chèns èkstra pa gana, si e kuater sifra ku el a kumpra, no sali promé premio òf den kabes.

Pa partisipá den ‘Match’, e kliente mester kumpra un dòler di 4 sifra. E ta paga un dòler èkstra i pidi pa Match e kuater sifra ei. Match ta nifiká ku aparte di e kuater sifra, e kliente ta haña tambe tur e kombinashonnan ku ta posibel ku e kuater sifra ei.  E kantidat di posibilidatnan di kombinashon ta varia, dependiendo di kuater sifra ku a kumpra. Tin kuater sifra ku ta duna 23 kombinashon máksimo, tin kuater sifra ku tin ménos kombinashon i tin kuater sifra ku no tin kombinashon mes. E kantidat di kombinashon ku e kliente ta haña ora e Match, ta dependé di e kuater sifra ku e kumpra.

Si e kuater sifra sali den kabes, e kliente ta kobra su premio korespondiente ku ta 3.000 dòler. Si e number aki no sali komo promé premio, pero si un di e posibel kombinashonnan i e kliente a match esaki, e kliente ta gana tòg 500 dòler.

Match ta optenibel na tur e 28 kantornan ku ta bende number na Boneiru entrante djaluna 22 di aprel 2013. E reglanan pa match lo ta visibel pa tur kumpradó den e kantornan di number.

 

 

Notisia Similar