Today is Thursday 24 April 2014

Notisia360

Instituto pa Formashon Musikal kandidato ‘Kroonappel’ di Oranje Fonds

19:32

  13 March 2013
Instituto pa Formashon Musikal kandidato ‘Kroonappel’ di Oranje Fonds

kroonappelsWILLEMSTAD — Na okashon di e kambio di korona ku ta na kaminda, Oranje Fonds ta organisá un búskeda pa “Kroonappels”. Tin tres kategoria: Hóben, Bario i Duna un Man. Instituto pa Formashon Musikal(IpFM) ta partisipá ku su proyekto di muzik kompletamente grátis na hóben ménos privilegiá den bario, den e akshon aki, den e kategoria “hóben(Jeugd)”.

For di awor por mira nos inskripshon riba www.kroonappels.com  bou di Curaçao. Den e fin di siman di  15, 16, 17 Mart 2013,  un i tur den komunidat por vota i asina yuda e pareha protektor di Oranje Fonds sa kiko ta biba riba e tereno akí. E organisashonnan ku risibí mas tantu voto ta pasa pa e siguiente buèlta. Na final esunnan ku sali ganadó lo risibí e titulo di “Oranje Fonds Kroonappel” i lo gana kada un € 50.000,= i un estatua chikí di bròns ku rei i la reina nobo lo entregá.

Tur aña Oranje Fonds ta entregá “Appeltjes van Oranje” i ta premia di e forma akí organisashonnan sosial eksitoso. Na okashon di kambio di korona ta organisá un edishon speshal. Organisashonnan sosial den henter Reino por partisipá den tres kategoria.

IpFM  a proponé e proyekto “edukashon musikal grátis na hóben ménos privilegiá den barionan di Kòrsou”. E inisiativa akí tin kasi 9 aña kaba i ta sòru pa tur siman 1000 mucha for di 8 aña ta haña lès di muzik den diferente bario, miéntras tur wikènt e orkesta i kantantenan di alumno mas avansá “Junior All Stars” ta trein den Cur Festival Center. Nos muchanan merese tur aporte posibel di komunidat di Kòrsou pa krese den publisidat tantu lokal i na Hulanda i asina logra nan metanan den muzik i nan bida personal.

Dor di gana un “Kroonappel” mas kaminda lo habri pa IpFM yega na e fondonan nesesario pa por kontinuá ku e proyekto úniko i mas grandi di edukashon musikal na Kòrsou, ku a produsí músikonan hóben ku ya na vários okashon a demonstrá di toka na nivel internashonal.(Freewinds, Dia di Bandera, Kanto pa Kòrsou, Archivo Nashonal, Aruba, Junior Tumba Festival & more ets.)IpFM ta spera ku boso tur ta vota pa nan pasobra nan ta un bon ehèmpel pa henter Reino.]

Oranje Fonds ta sostené inisiativanan sosial ku fondo, konosementu i kontakto. E fondo ta inbertí pa aña komo € 30 mion na mas ku 8.000 organisashon chikitu i grandi den Reino Ulandes. Oranje Fonds ta finansiá pa Postcode Loterij, pa su Organisashon di Amigunan i pa komersio, Prens Willem Alexander i Prinsesa Máxima ta e pareha protektor di Oranje Fonds.

Tambe ta bon pa nos informá ku resien IpFM a habri un Facebook Page pa Junior Allstar Orchestra. Nos ta rekomendá tur hende pa “like” e página aki.

 

 

Notisia Similar